ជនជាតិបារាំងធ្លាក់ក្នុងផ្នត់គំនិតអំនួត ដោយសារប្រវត្តិសាស្ត្រជនជាតិ និងភាពជឿជាក់ខ្លួនឯង។ ក្នុងវិស័យជំនួញ ក៏ដូចនយោបាយដែរ ជនជាតិបារាំងជាមនុស្សឯករាជ្យ និងអភិរក្សថែមទៀតផង ហើយកត្តានេះពេលខ្លះអាចធ្វើឲ្យមានបញ្ហាក្នុងជំនួបចរចាជាមួយដៃគូ បើភាគីម្ខាងមិនបានស្វែងយល់ពីវប្បធម៌ ឬចរិត លក្ខណៈនៃជនជាតិនេះ។
ជនជាតិបារាំងមានផ្នត់គំនិតថា បារាំងជាប្រទេសបានបង្កើត ច្បាប់ទម្លាប់ បទបញ្ញត្តិ បទដ្ឋាន លទ្ធិប្រជាធិបតេយ្យ យុត្តិធម៌ ប្រព័ន្ធរដ្ឋបាល ប្រព័ន្ធច្បាប់ផ្សេងៗ យុទ្ធសាស្ត្រកងទ័ព វិទ្យាសាស្ត្រ វប្បធម៌ ឥរិយាបថ ឬសិល្បៈធ្វើម្ហូបជាដើម។
បារាំងប្រកាន់អាកប្បកិរិយាក្នុងកម្រិតមធ្យម មិនស្និទ្ធស្នាលពេក ក៏មិនអវិជ្ជមានដែរ។ ក្នុងជំនួបឧទ្ទេសនាមពីផលិតផលគុណភាពរបស់ដៃគូ ជនជាតិនេះជានិច្ចគិតថា ខ្លួនឯងជាចម្បង លើកតម្កើងខ្លួនឯងខ្ពស់ជាងដៃគូ។
បើអ្នកចង់ទាក់ទងដៃគូជនជាតិបារាំង តើគួរប្រើវិធីសាស្ត្រអ្វីដើម្បីឲ្យមានប្រសិទ្ធភាព? ដើម្បីសម្រេចបានការចរចាប្រកបដោយប្រសិទ្ធភាព អ្នកគួរតែស្រាវជ្រាវ ចិត្តសាស្ត្រក៏ដូចយុទ្ធសាស្ត្ររបស់ជនជាតិបារាំង នៅពេលជួញដូរជំនួញ។ ជនជាតិបារាំងចូលចិត្តប្រើ ឬបញ្ចេញឫកពាររបៀបបារាំង ដូចខាងក្រោម៖
- ស្លៀកសំលៀកបំពាក់របៀបអ្នកធ្វើការ (អាវធំ) ឬអ្នកធំ ក្នុងពេលណាត់ជួប។
- ប្រើប្រាស់ឈ្មោះត្រកូល ដោយការឧទ្ទេសនាមប្រកបដោយការគោរព និងអង្គុយតាមលំដាប់ ថ្នាក់តំណែង។
- រក្សាភាពថ្លៃថ្នូរ និងការគួរសម ក្នុងពេលចរចា
- បញ្ចេញទស្សនៈយ៉ាងឡូហ្ស៊ីក (logic) វិភាគស៊ីជម្រៅ និងត្រៀមខ្លួនជានិច្ចក្នុងការវាយប្រហារដោយត្រង់ ចំណុចខ្សោយនៃទស្សនៈដៃគូ។
- ជនជាតិបារាំងនិយាយច្រើន ហើយការចរចាតែងតែត្រូវការពេលវេលាយូរ។
- មិនទាមទារ ឬសំណូមពរ គ្រាដំបូងទេ ប៉ុន្តែសំណូមពរនឹងត្រូវលើកយក តាមរយៈការបញ្ចេញហេតុផលដែលត្រូវបានត្រៀមយ៉ាងល្អិតល្អន់។
- ព្យាយាមកំណត់សំណើ និងគោលដៅនៃដៃគូ តាំងពីដំណាក់កាលជួបគ្នាលើកដំបូង។
- មានការសង្ស័យ បើដៃគូបង្ហាញភាពស្និទ្ធស្នាលនាគ្រាដំបូង មិនចូលចិត្តដោះអាវធំ។
- មានអំនួតលើខ្លួនឯង ព្រោះតែលទ្ធភាពគិតរហ័ស មិនចូលចិត្តរងសម្ពាធដោយការបង្ខំប្រញាប់ធ្វើការសម្រេចចិត្ត។ ជាតិបារាំងគិតថា ការចរចាព្រមព្រៀងរហ័សមិនអាចទទួលបាននូវប្រសិទ្ធភាពនោះទេ។
- កម្រសម្រេចចិត្តភ្លាមៗ ក្នុងពេលជំនួប។
- តែងតែព្យាយាមអូសពេលវេលាការចរចា ព្រោះគេគិតថា វាជាវិធី ដើម្បីស្គាល់គ្នាយកពេលវេលាដើម្បីស្វែងរកចំណុចខ្សោយរបស់ដៃគូ។
- កំណត់គោលដៅវែងឆ្ងាយ ចង់បង្កើតទំនាក់ទំនងលក្ខណៈបុគ្គលរយៈពេលយូរ។
- មិនបន្ធូរដៃក្នុងការចរចា លើកលែងតែទស្សនៈរបស់ពួកគេចុះខ្សោយ។
- ព្យាយាម រៀបរាប់ច្បាស់លាស់ និងត្រឹមត្រូវ។
- តែងគិតថា ចំណេះដឹងរបស់ជនជាតិខ្លួនមានកម្រិតខ្ពស់ជនជាតិដទៃ
- អនុវត្តត្រឹមត្រូវតាមលំដាប់លំដោយនៃផែនការ ប៉ុន្តែនៅពេលពិភាក្សាប្រធានបទជាលម្អិតមិនមិនអនុវត្តតាមលំដាប់លំដោយនោះទេ។
- ជនជាតិអាមេរិក ឬអង់គ្លេសតែងតែត្អូញត្អែរថា ភាគីបារាំងនិយាយយូរ និយាយវែងឆ្ងាយ ប៉ុន្តែចុងក្រោយវាមិនឈានទៅដល់ការសម្រេចចិត្តអ្វីឡើយ។
- ស្វែងយល់បន្ថែមពីជនជាតិបារាំង
នៅពេលទាក់ទងជាមួយដៃគូបារាំង អ្នកគួររៀបចំឥរិយាបថលើសពីធម្មតា ត្រូវបញ្ចេញយោបល់ប្រកបដោយឡូហ្ស៊ីក (logic) ចៀសវាងការធ្វើការរបៀបមនោសញ្ចេតនានៃជនជាតិអាមេរិក ឬទម្លាប់នៃការសម្រេចចិត្តដោយវិចារណញ្ញាណរបស់ជនជាតិអង់គ្លេស។ បើអ្នកបញ្ចេញយោបល់ប៉ះពាល់តែបន្តិចបន្តួច ភាគីបារាំងនឹងប្រតិកម្មភ្លាមៗ។
ទោះជាជនជាតិបារាំងផ្ដោតលើភាពឡូហ្ស៊ីក និងភាពត្រឹមត្រូវ ប៉ុន្តែជនជាតិនេះចូលចិត្តការពិភាក្សាបែបលម្អិត មិនកំណត់ពេលវេលា។ បើភាគីនិយាយមិនគ្រប់ជ្រុងជ្រោយ នោះគាត់នឹងត្រូវជនជាតិបារាំងចាត់ទុកប្រភេទមនុស្សនិយាយតិច។
អ្នកមិនគួរនិយាយមិនល្អ ពីស្ដេចណាប៉ូឡេអុង ដែលជានិមិត្តរូបដ៏ពិសិដ្ឋ និងជាទីគោរពរបស់ជនជាតិបារាំង ប៉ុន្តែអ្នកអាចនិយាយពីលោក Charles De Gaulle, Francois Mitterrand ឬមេដឹកនាំបារាំងណាក៏បាន៕
